近7次对赛全胜韦斯咸
周三晚上英超亚洲挑战盃喺南京开打，其中上季英超盟主曼城将会面对「锤仔帮」韦斯咸。曼城呢次虽然冇咗阿古路，不过以史达宁为首嘅一班球星质素依然超班，加上领队哥迪奥拿讲到明唔会揸流摊，呢场食硬「私房菜」韦斯咸。
（Now 621周三晚8时30分直播）
曼城2013年曾喺香港大球场捧起过英超亚洲挑战盃，相信唔少香港球迷都依然记忆犹新，呢次阿古路、加比尔捷西斯、费兰甸奴同艾达臣摩拉斯都因为早前出战美洲盃而获免战牌，另外马列斯仲踢紧非国盃未归队，不过唔好以为比赛会因此星味大减。皆因曼城官方已经证实基尔获加、奇云迪布尼、大卫施华同贝拿度施华等巨星依然会随队出征之馀，新加盟嘅洛迪卡斯简迪都有机会首次为「蓝月亮」上阵，球队整体水准依然强劲。为延续上季勇态，领队哥迪奥拿就直言季前热身赛都唔可以鬆懈，可见「蓝月亮」呢场绝对係志在必得。相反韦斯咸主力前锋阿拿奥杜域啱啱离队加盟中超球队上海SP，而耶莫兰高又重伤初愈状态难有保证，斋靠「小豆」查维亚靴南迪斯嘅韦斯咸好难发围，况且两队近7次交手曼城赢晒，呢场「蓝月亮」好大机会继续食住「锤仔帮」。
纽卡素遇狼队少波入
另外纽卡素将会斗狼队，自西班牙名帅宾尼迪斯离队之后，「喜鹊」现时处于冇人挂帅嘅状态，球会内部立立乱，而人脚方面，除艾约斯佩雷斯同祖斯卢辛马田两位攻击手已经相继离队，荷西朗顿同米基尔阿米朗都啱啱踢完太公波尚未归队，锋力难有保证，呢场对住同样缺少箭头人物鲁尔占美尼斯嘅狼队，两军进攻板斧肯定唔算多，睇怕呢场都唔慌多波入。
（Now 621周三晚6时直播）