打吡战Round 1不敌西部联
今日下午澳职头场爆发墨尔本市打吡，新军西部联主场硬撼墨尔本胜利。西部联近期跌Watt跌得几犀利，3连败冇晒开季时嘅气势，胜利上仗终走出4场不胜困局，势必食住度气喺打吡战扬威，此消彼长，受让嘅胜利下盘值得捧场。

（myTV Gold 302、Now 639、有线655及615台周日下午1时直播）

今次係双方本季第2次交锋，上次西部联作客落后2球下，连追3球爆冷反胜3比2，今次虽然返回地头出战，理论上更有优势，不过西部联近况认真麻麻，佢哋近3场联赛输晒兼冇波入，阵中几名星级老将包括贝利沙、迪亚文迪等都冇料到，完全带唔起队波，气势同季初相比可谓差天共地，亦某程度显示，澳职列强已开始摸清呢支新军嘅底牌，相信西部联嚟紧都几难捱。

战绩反弹受让笋
3届常规赛及4届季后赛冠军墨尔本胜利，底蕴当然远胜西部联，单係贝利沙当年最风光嗰阵，就係效力胜利成为一代战神。儘管佢哋今季演出令人失望，开季8场联赛仅获2胜2和4负，依家已经被榜首FC悉尼甩开成条街，要争夺常规赛冠军机会渐趋淼茫，不过贵为墨尔本市1哥，胜利当然唔想连续2场打吡战输波。加上胜利上场以1比0击败珀斯光辉，总算终止4场不胜颓势，士气点都好过3连败嘅西部联，预计墨尔本胜利今场有力反客为主，有得受让平半咁笋，下盘不容错过。