今晚英超独脚戏上演伦敦打吡，沉到爆嘅阿仙奴作客「锤仔帮」韦斯咸。阿仙奴转用看守领队龙格保后未见起色，连续9场未赢过创42年来新低，场场畀人「风冚」咁攻点反弹呀？加上近年造访韦斯咸例冇运行，冇本钱让波，宁捧「锤仔帮」让球主胜。

（Now 621周二凌晨4时直播）

近期英超兴搵球队名宿救亡，上季曼联有苏斯克查，今季车仔就搵番林柏特，连爱华顿上周亦提升邓肯费格逊顶住档先，个个都交到货，佢哋经验唔够唔紧要，最起码令球员打番起「血性足球」，爱华顿日前赢车仔3比1就係最佳例子。阿仙奴亦有样学样，之前怒炒艾美利后，将助教兼名宿龙格保转做看守领队，点知头2场对弱旅诺域治同白礼顿，只得1和1负，连续9场未赢过创42年来新低，战术溷乱之馀，连最基本嘅斗心都唔多够，好似上仗主场以1比2输畀白礼顿，全场畀人射门达20次，呢点喺今季经常出现，堂堂Big 6劲旅颜面何存，龙Sir真係要有排执。

韦斯咸尼敦贺兰特崛起
另一边厢，韦斯咸状态都唔好得几多，近5仗只得1胜4负，不过赢嗰场正正係对车仔，近3次对Big 6劲旅亦获得2胜1负，遇强愈强，而且主帅比历连尼亦有被炒危机，睇番佢哋其实只差阿仙奴3分，今仗赢波即可跳出下游，斗志必坚。「锤仔帮」青训一向出色，近期则有21岁新星尼敦贺兰特崛起，佢今季喺二队上阵11场入9粒兼交出6次助攻，上周中快车对狼队更后备入替，首度为一队于英超上阵，日前佢亦冇参与预备组赛事，随时成为今仗秘密武器。翻查纪录，阿仙奴近4次作客韦斯咸，赢得1场咁大把，实在让唔到「锤仔帮」，让球主胜咪错过。