汉堡遇恩物誓打翻身仗

2020/05/31文:臻赢特
周日晚德乙上演头尾大战，汉堡主场斗护级分子韦恩。复赛后仲未赢波嘅汉堡，争胜欲望十足，加上主场表现不嬲醒过作客，面对近期两连败嘅韦恩，自然希望大胜一仗吐乌气，让球主胜咪错过。（myTV SUPER周日晚7时30分直播）

韦恩两大主力坐波监
矢志重返德甲嘅汉堡，复赛后遇上地狱赛程仲未开斋，头两场打和前列格雷特霍夫及「1哥」比勒费尔德，上仗作客「2哥」史特加，临完场先畀对手攻入奠胜一球，搞到现时第3嘅位置唔稳阵，上季临尾错失重返德甲嘅伤痛记忆犹新，为免重蹈覆辙，必须尽快搵番条赢波方程式。好彩汉堡主场威力有返咁上下，今季13仗主场获9胜，当中6次赢2球或以上，今晚面对实力次一皮嘅韦恩，值得睇高一线。

暂时位列尾二嘅韦恩护级形势严峻，尤其抢分能力被人诟病。复赛后接连不敌海登咸同辛特侯逊，两场波一球都入唔到，上仗中场杜比亚斯舒韦迪仲要两黄一红被逐离场，今场要同主力射手迪特根齐齐坐波监。韦恩今季28战输咗14场，仲多过榜尾特雷斯登，随时成为汉堡出气袋，一于捧让球主胜。