新帥來頭唔嘢少

今午澳職獨腳戲，布里斯班獅吼中立場迎戰阿德萊德聯。雖然英格蘭名將科拿喺停擺期間離開獅吼，好彩獅吼今季表現遠勝阿德萊德聯，而且新帥唔嘢少，獅吼未必會走樣，主勝博得過。（myTV Gold 302、Now 639、有線655及615台周日下午5時30分直播）

喺澳職停擺前，布里斯班獅吼正值3連勝，係狀態最好嘅球隊。可惜經歷近4個月嘅停賽期，各隊都面目全非，獅吼亦唔例外，其中主帥科拿因為疫情關係上月宣布辭職，近日宣布改由禾倫穆恩執教。呢位英格蘭教頭本身係獅吼二隊教練，亦係一隊助教，熟晒班波，相信由佢「頂檔」成績唔會有太大走樣。

喺陣容方面，獅吼復賽前從紐卡素噴射機撬走中場列登頓，今仗可以隨時候命，另外仲有話題新兵金丹尼（Danny Kim）。呢位韓裔中場現年21歲，出身自獅吼青年軍，之後轉踢「兄弟球隊」昆士蘭獅隊時表現出色，更入選年度最佳球員，同時「Danny仔」仲係現時助教戴倫戴維斯教澳洲青年軍時嘅愛將，今次故劍重逢，肯定會落力演出報答戴維斯嘅知遇之恩。

阿德萊德聯將帥離隊

另邊廂，阿德萊德聯「散檔」問題就大得多，首先荷蘭籍主帥華碧克喺停擺期間與會方解約，現由助教華艾特頂檔，同時荷蘭中場米高馬利亞亦都離隊，最搞鬼係門將艾錫李察士，竟宣布「提早掛靴」並轉戰MMA，陣容可謂天殘地缺。

再睇埋戰績，獅吼停擺前3場聯賽全勝，相反阿德萊德聯就4戰全敗，個陣容仲要天殘地缺，加上獅吼新帥似乎比阿聯新教頭可靠得多，獅吼主勝分頭唔錯，值得一試。