今晚东南亚锦标赛爆发决赛首回合，先由马来西亚主场迎战越南。马来西亚今届东锦赛法定时间赢得3仗咁大把，而且主力沙发利坐波监，实力削弱，相反越南有射手阮公凤压阵，加上近年喺东南锦碰头食住对手，今场有力反客为主，客胜好路。
（有线602及662台周二晚8时45分直播）
马来西亚虽然喺4强淘汰卫冕嘅泰国，但两回合只系打和2比2，仅仅靠较多作客入球晋级，若非泰国喺次回合补时阶段射失12码，马来西亚已经出局，幸运成分极高，而喺嗰场末段犯规导致被罚12码嘅主力沙发利做埋「红牌阿姑」，今场要坐波监，影响非常之大。
越南美斯脚风顺
睇番马来西亚喺今届6战法定时间内，只得3胜2和1负，晋级过程唔多够说服力。相反，越南喺今届6战法定时间取得5胜1和未输过，4强两回合计以4比2击退由名帅艾历臣领军嘅菲律宾，霸气十足，其中有「越南美斯」之称嘅阮公凤今届已入左3粒。翻查纪录，两军近4次喺东南锦交手，越南录得3胜1负，明显格食格，今仗可抢先机，客胜有计。