欧霸32强次回合西维尔斗拉素周四凌晨提早上演，首回合领先1球嘅西维尔一向靠主场搵食，近7场欧霸主场全胜，而且上周联赛收起晒宾耶达同沙拉比亚，摆明要搏呢场，相信佢哋可以再藉地利再赢拉素，捧1.7倍主胜。
（Now 643、有线656及616台周四凌晨1时直播）
连同前身足协盃，西维尔过往曾5度称霸欧霸，经验相当丰富；上周中首回合，西维尔就凭前锋宾耶达一箭定江山，作客小胜拉素1比0，呢名法国前锋近7场欧霸入6球，屡有佳作，火力值得信赖。宾耶达咁掂，教练文治梗係锡住嚟用，喺啱啱输畀维拉利尔嘅联赛，宾耶达同另一进攻中场沙拉比亚都冇踢正选，下半场先上阵，养精蓄锐喺今场欧霸盃搏杀。
拉素首回合落后焗攻
另一边厢，拉素状态飘忽，近7场仅得2胜1和4负，单计作客，近4战更只得1胜1和2负，可见射手恩莫比尼受伤影响甚大。查实呢支意甲球队喺近6场欧霸仅得2胜4负，首回合落后1球，今场为晋级更要焗攻，西维尔嘅反击战术大派用场。睇番西维尔喺欧霸盃主场出击特醒，近7场全胜，其中6场赢对手2球或以上，堪称「主场龙」，主胜不容错过。