今晚英超Big 6只有热刺登场，佢哋将于头场造访般尼。热刺开波前迎来好消息，抖咗超过1个月嘅神锋哈利卡尼全面复操，今场大有机会后备上阵，领队普捷天奴本身已有状态极勇嘅孙兴民打天下，依家仲多咗筹码揿掣，胜算更高。般尼遇强即屈，今季主场对Big 6球队利物浦、车路士及曼联全败，热刺客胜有买趁手。
（Now 621周六晚8时30分直播）
先唔讲「哈神」哈利卡尼嘅回归，热刺淨係一个孙兴民，都已经够令般尼后防头痕。呢名南韩王牌自战罢亚洲盃归队后，不但未见疲态，反而愈踢愈醒神场场有士哥，近4战劲轰4粒，脚风超顺，带领球队取得4连胜，3场联赛对屈福特、纽卡素同李斯特城赢波可以话正常发挥，最重要係上周中欧联16强首回合3比0击溃多蒙特，堪称代表作，士气非常高涨。今场热刺仲有哈利卡尼已伤愈候命，阵容及火力更强，领队普捷天奴赛前记招表示，10日前「哈神」话自己已经可以上阵，不过佢想呢名英格兰前锋抖足先搏杀，今场会先作后备，呢番说话可以理解为，普帅对其他球员信心十足，即使唔用「哈神」都够杀。
般尼主场「欺善怕恶」
般尼虽然近况冒升，但今季主场「欺善怕恶」，对Big 6球队全部输晒。而且热刺对般尼格外醒神，近5次交手获4胜1和，今季更係英超作客王，13战赢咗11场，所以今场客胜乃不二之选。