鹽湖城實畀銀河沖冧
文:Mic少

作客腳軟7戰狂失25粒
美職周中加快開車，因為踢完今輪之後，就會休戰近兩周，讓路畀7月7日至26日喺美國舉行嘅美洲金盃賽事。今輪最好路一定係洛杉磯銀河主場對皇家鹽湖城，鹽湖城衰到貼地，作客更幾乎任由對手宰割，連同聯賽及盃賽在內，近7場作客輸晒，合共失咗25球，換言之，平均每仗失超過3球，梗係捧對家洛杉磯銀河讓球主勝。

（TVB 303周三早上10時30分直播）
洛杉磯銀河往績佔優
皇家鹽湖城一向靠高原主場搵食，作客水準往往大打折扣，上月中美聯盃作客低組別球隊薩克拉門托共和，竟然慘敗1比4，實在非常離譜，今場又要作客，恐怕球員未踢已經先輸信心。至於洛杉磯銀河雖然聯賽兩連敗，但佢哋近4次對皇家鹽湖城，取得3勝1和，其中包括今年3月作客贏2比1，今仗仲有地利，勝算更加高。

撐ＦＣ達拉斯讓球主勝
另1場，ＦＣ達拉斯主場對華盛頓聯隊，ＦＣ達拉斯上仗擊敗勁旅ＦＣ多倫多，錄得主場4連勝，走勢非常凌厲。反觀，華盛頓聯隊聯賽作客連輸4場，而且1球都入唔到，形勢高下立見，捧ＦＣ達拉斯讓球主勝。
（TVB 303周三早上8時30分直播）