今晚欧联分组赛煞科日头场之一，G组「1哥」皇家马德里主场迎战莫斯科中央陆军，笔者亦有份评述呢场波。虽然卫冕嘅「银河舰队」已锁定首名出线，但出新仔反而仲搏命，就算让球盘要让两球，照捧皇马上盘。（香港开电视77台、有线662及602台周四凌晨1时55分直播）
皇马喺上轮欧联轻取罗马两粒后，提早获得小组首名出线。呢支连续3届欧联封王嘅劲旅，自从少帅苏拿利中途接手后，9次领军赢左8场，连场报捷令众将信心返晒嚟。既然系咁，今仗好大机会收起主力，但唔代表用新仔一定唔掂，其中马高斯洛兰迪近期趁住卡斯米路受伤，乘机上位，中场丹尼施巴路斯近期都好Sharp醒，而巴西前锋云尼斯奥斯祖利亚极具潜质，系时候要争取表现，务求喺苏帅心目中留下好印象，连同马高阿辛斯奥及卢卡斯华斯基斯每逢出场都有货交，呢班「生牯仔」上阵随时更搏命。
中央陆军踢欧联未够班
作客嘅中央陆军依家排包尾，近3场欧联输晒摆明唔够砌，由于对赛较差，佢的除要尽力争胜抢分，亦寄望柏辛域陀尼亚今轮失分，先可爬上第3取得欧霸资格，但作客要喺皇马身上抢分难度太高，捧番上盘好过。