欧联16强首回合好波连场，今晚轮到衞冕嘅「银河舰队」皇马登场，作客硬撼阿积士。
阿积士被称为「球星的摇篮」，因为呢支荷甲班霸重视青训，以往培育出告鲁夫、云巴士顿、列卡特、朗奴高文、柏金、史奈达等名将，最新产品有法兰基迪庄同马菲斯迪历特，前者更畀巴塞隆拿「预订」，下季会加盟。查实阿积士喺前届欧霸盃杀入决赛，并喺今届欧联闯入16强，係近年最佳成绩，呢班生牯仔不能小觑。
舰队大战经验胜一筹
不过，欧联贵为欧洲最高水平嘅球会级盃赛，经验最为重要，而呢方面皇马先係专家，唔单止曾13度封王为各队之冠，近5届4度捧盃，包括连赢最近3届，风头一时无两。虽然在功勳主帅施丹离队后，经历咗一段阵痛期，好彩从二队提升嘅苏拿利接手后，「银河舰队」终于重上正轨，除咗勇夺世冠盃外，近7仗豪取6胜1和，包括啱啱喺打吡战勇挫同市死敌马体会，气势如虹。箭头宾施马入球不断外，加里夫巴利亦伤愈复出，呢班功臣经验丰富，绝对係可恰死阿积士一众生牯仔，就算作客亦可先拔头筹。