新星鬥老餅高下立見
美洲國家盃8強「兩巴大戰」巴西對巴拉圭，「森巴兵團」冇咗尼馬，好彩仲有羅拔圖法明奴頂上，呢位進攻中場轉任前鋒一樣掂，上仗更射入致勝一球，成功上位！呢位全能戰士剛落實加盟利物浦，今仗拍住「自己友」菲臘比古天奴，預演紅軍新世代威力，令人期待。反觀，巴拉圭仲要靠老將巴里奧斯、希度華迪斯同辛達告魯斯等「老餅」搵食，成班波暮氣沉沉，受讓半一都冇運行，捧「活力森巴」上盤。（now681周日凌晨5時30分直播）

紅軍雙奴擔正騷哥利
尼馬停賽離隊，9號仔迪亞高泰迪利冇料到，但就造就咗羅拔圖法明奴上位，呢位23歲新星上季德甲轟入7球，成為賀芬咸次席射手，埋門把握力強。因此，領隊鄧加突然安排佢出任前鋒，一樣冇問題。利物浦日前迅速出手以球會史上第2高轉會費2,900萬鎊簽下羅拔圖法明奴，令佢即時成為大紅人，今仗當然要「騷哥利」顯示身價。同樣23歲嘅菲臘比古天奴亦逐漸獲得鄧加重用，上仗仲正選披甲，而且仲交足功課。呢兩位「90後」球員都係趁尼馬「出事」先至有機會出頭，所以一定要把握餘下賽事盡力搏殺，助巴西晉級甚至捧盃，以證明自己有資格佔據正選席位，否則將來尼馬回歸，佢哋隨時又要坐番冷板。

巴拉圭三老疲不能興
巴拉圭上屆8強同巴西激戰120分鐘，打和0比0，最終憑互射12碼勝出。4年之後呢隊波仲係食緊老本，前線依賴年過30嘅巴里奧斯、希度華迪斯同辛達告魯斯等老將輪換攻堅。無錯呢三老大戰經驗豐富，但始終高峰期已過，頻密賽程之下，體力肯定輸蝕，小組賽連搏3場已經耗盡呢架「老巴」嘅能源，嚟到8強激戰隨時谷唔起，相信好難頂得住剛啱入滿油嘅巴西「紅軍雙星」進襲，森巴兵團讓波未驚過，上盤照捧！