明早在加拿大舉行嘅女子世盃4強爆發「日英大戰」，衞冕之師日本女足決戰英格蘭女足。「三獅女」今屆創造歷史首度殺入世盃4強夠晒叻，上仗入波功臣祖迪泰萊更備受激讚，傳媒甚至貶低男足抬高佢哋，「三獅女」挾4連勝勢頭絕對唔赦今非昔比嘅「瀛女」，受讓下必揀讓球客勝。（中央5台周四早上7時直播）

「英女」今屆喺不被睇好情況下，克服首仗落筆打三更嘅困局，連贏4仗首次殺入世盃4強，真係威過近年不濟嘅「三獅男兵」多多聲，上仗對加拿大先開紀錄嘅祖迪泰萊更成為焦點。話說佢喺中圈附近醒目地藉對方失誤截到個波，然後殺入大禁區建功，球速達81.43公里，而佢從大禁區起腳到入波只用咗0.73秒，型到爆燈。

日本場場僅熟冇霸氣
女足咁爭氣，傳媒梗係讚爆，《每日郵報》仲登咗張愛華頓小將巴克里嘅度假相，呢位堂堂男子漢寧願放暑假都唔願為英軍出戰U21歐國盃，藉此凸顯「三獅女」為國拚搏嘅熱血。

日本女足今屆賽事5戰全勝似乎好勁，但場場都僅贏1粒，反映火力不足冇霸氣，好似上仗對澳洲女足全場老鼠拉龜，直至後備入替嘅岩淵真奈完場前入波先險勝晉級。主力大儀見優季今屆冇咩表現，上屆最佳球員36歲中場澤穗希更係連續兩場做後備，除咗首仗受傷嘅中場安藤梢已退隊外，前鋒菅澤優衣香練波時整親未必出得，問題多多點讓得起氣勢如虹嘅英格蘭呢？近兩次喺世盃交手「三獅女」未輸過，讓球主客和受讓一球，斯維強捧佢哋讓球客勝。