話咁快美洲國家盃嚟到尾聲，明早季軍戰秘魯對巴拉圭先請你食份「大」早餐！雖然話季軍戰競爭氣氛唔濃，對賽雙方喺冇壓力下都會踢得開放，咁啱秘魯箭頭荷西古里有望想蟬聯金靴，巴拉圭嘅巴里奧斯亦有機會同佢搶過，兩大殺手鬥射術，而近5屆季軍戰例演大騷，今仗入波點會少？一於撐大盤。（now 681周六早上7時30分直播）

兩大射手搶金靴
秘魯於4強力戰不敵東道主智利，後者明顯獲球證多番「眷顧」，包括中堅森拜奴開波僅20分鐘便直紅被逐，以寡敵眾下輸1比2，可謂雖敗不辱，由於森拜奴坐波監，勢必令後防暴露更多空位。當然秘魯最大殺着係荷西古里路，佢踏入淘汰賽腳風轉順，8強對玻利維亞大演帽子戲法，而且佢正係於上屆季軍戰對委內瑞拉連中三元，帶領球隊做「三哥」之餘，自己亦以5球榮膺神射手，證明呢位依家有3球在手嘅前鋒，最識得喺季軍戰數胡。

巴拉圭上仗慘敗畀阿根廷六個一皮，中場達里斯干沙利斯同隊長辛達告魯斯喺上半場連環受傷，今仗肯定缺陣，尤其係後者唔出得，造就另一前鋒巴里奧斯擔正，呢位前FC廣州射手鹹魚翻生，今屆上陣144分鐘及5次埋門便攻入3粒，平均48分鐘入1球，成為今屆射門效率最高嘅鋒將。依家巴里奧斯同古里路叮噹馬頭，只差射手榜一哥智利嘅伊度亞度華加斯1球，兩人為領軍爭季軍兼搶金靴，必定搏盡爭取士哥。

近5屆全部開大
況且每逢大賽嘅季軍戰，兩軍喺冇心理包袱下，都會放開懷抱互相駁火。單計美洲盃，近5屆季軍戰（見附表）均於法定時間內全部開大，預計今仗唔會例外，1.62倍大盤值得追。