斯德哥爾摩打吡撐佐加頓斯
當歐聯主流聯賽陸續收鑼嘅時候，北歐波正進行得如火如荼，瑞典超「斯德哥爾摩打吡戰」佐加頓斯主場對AIK蘇納，值得留意。AIK蘇納上周中對哥登堡，賽前爆出受外圍集團操控，仲有AIK蘇納球員涉嫌收受利益，結果場波臨時取消。今次醜聞肯定打擊AIK蘇納士氣，加上有2位球員停賽，更加雪上加霜，佐加頓斯可望把握機會全取3分，主勝值博。
（周二凌晨1時開賽）
北歐波蠱惑多，芬蘭聯賽更加係重災區，估唔到呢股歪風目前吹到瑞典。好彩瑞典足總今次發現得早，而且迅速行動，取消比賽，盡顯打擊假波決心，相信短期內，外圍集團同球員都唔敢亂嚟。不過，AIK蘇納有球員捲入事件，難免會造成人心惶惶，屋漏偏逢連夜雨，AIK蘇納今場仲有門將奧斯卡連拿、後衞辛特格倫停賽，防線有隱憂，令佐加頓斯可乘虛而入。
AIK蘇納球員涉貪立立亂
佐加頓斯見到同市死敵AIK蘇納一身蟻，唔趁機踩多一腳，仲等幾時。佐加頓斯狀態唔錯，近3場主場取得2勝1和，即使佢哋近3次對AIK蘇納都輸波，但今場仲要讓波，就知莊家睇好佐加頓斯，值得跟進。
另一場瑞典超，辛斯華爾成為「和波專家」，近6場有5場打和，其中4場係0比0，今仗主場對哥登堡，入球細穩陣。挪超方面，維京3連敗，頹勢未止，今仗作客史達比克，捧對家主勝。
