葡U21攻守兼備爭霸典範

U21歐洲國家盃周三凌晨上演冠軍戰，由瑞典U21惡鬥葡萄牙U21，兩支球隊同樣未染指過該項錦標，邊個贏波都會寫上U21歐國盃歷史新一頁。葡萄牙喺4強大數德國5:0，盡顯攻守兼備，就連名宿費高都讚Like，家陣班波士氣高漲，對住防守麻麻嘅瑞典有力贏波捧盃，1.63倍客W咪走寶。（開賽時間：周三凌晨2:45）

瑞典防守麻麻場場失波
查實兩軍喺B組賽後一輪賽事交過手，當時雙方打和1:1後因為夠分攜手出線，之後明顯收油拉布拖到完場，結果惹人詬病。今次再度碰頭，睇怕兩邊生牯仔唔敢再揸流攤。講火力，兩隊同樣轟入7球，可謂不相伯仲，但提到防守，瑞典就明顯差一班，睇番佢哋今屆4戰每場都失1粒，證明班波根本堵塞唔到後防漏洞，就算守將巴夫奧復出都幫唔得幾多。

費高twitter幫師弟打氣
反觀葡萄牙條防線就可靠好多，4戰夾埋只有1次失守。雖然中堅泰亞高艾羅尼喺上仗對德國賽前熱身嗰陣受傷，之但係臨危受命嘅費古歷列度並冇怯場，協助球隊零封對手，就算泰亞高艾羅尼今仗趕唔切復出，對防線影響有限。況且葡萄牙「黃金一代」嘅代表人物費高上仗賽後喺twitter向一眾師弟打氣，佢哋梗係唔想步前輩喺94年決賽屆居亞軍嘅後塵，呢鋪仲唔搏盡捧盃創歷史咩？