巴拉圭煞廷球王冠軍夢

美洲盃明早上演4強大戰阿根廷硬撼巴拉圭，兩軍繼分組賽後再交鋒。阿根廷球王美斯好波唔使多講，但卻偏遇到個唔識用佢嘅主帥馬天奴。唔計12碼等死球士哥，呢位隊長喺國家隊已陷500分鐘「生波」入球荒，今仗撞正由同鄉兼有料領隊雷蒙戴亞斯率領嘅巴拉圭，美斯嘅冠軍夢隨時畀「自己友」煞停，讓球盤阿根廷要讓一球太辣，斯維寧撐巴拉圭下盤。（now 681周三早上7時30分直播）

美斯陷「生波」入球荒
美斯喺阿根廷同巴塞表現差天共地，唔係第一日嘅事，不過自主帥馬天奴去年上任後情況更嚴重。美斯為國家隊入波總係異常困難，喺馬帥麾下好似淨係識得入12碼，唔計極刑等死球士哥，美斯已經500分鐘冇波入，佢上次非12碼入波要數番去年10月同香港隊「拍跳」狂數7蛋之役，如只計國際大賽，呢個「生波」入球荒更長達800分鐘，而且自07年美洲盃4強建功擊敗墨西哥後，美斯近8年於大賽共9仗淘汰賽零士哥，要圓國際賽冠軍夢絕不容易。

馬天奴學巴塞將美斯移去右路，無奈中場成堆工兵，只有柏斯托尼屬用波球員，但馬帥不自量力堅持控球，搞到美斯焗住要返後攞波，威力大減。睇番阿根廷坐擁美斯、阿古路、迪馬利亞及後備嘅希古恩、泰維斯嘅強勁鋒線，今屆4戰入得4粒咁大把，上仗圍攻哥倫比亞，全場16次埋門仍然冇入波，最終僅靠互射12碼晉級，賽後美斯都嘆入波難，馬天奴戰術不濟可謂責無旁貸。

阿根廷讓一球太辣
同馬天奴相反，同屬阿根廷籍領隊雷蒙戴亞斯將巴拉圭起死回生，佢唔單止激活咗辛達告魯斯、希度華迪斯同巴里奧斯等老將，並重燃眾將對爭勝嘅飢渴感，上仗對巴西落後一球下未有放棄，終能扳平最後更憑極刑大戰晉級。

查實戴亞斯做球員嗰陣都幾威，79年同球王馬納當拿帶領阿根廷奪得世青盃，從教後亦帶領河床捧過阿甲同自由盃，今屆分組賽首仗連追兩粒逼和阿根廷，證明雷帥臨場調動遠勝馬天奴。雙方再狹路相逢，唔好睇得阿根廷咁高，讓球盤仲要讓一球咁多，斯維認為巴拉圭至少喺法定時間唔使輸，2.08倍下盤咪錯過。