講到二線波，又點少得巴甲？今晚爆發同州打吡戰，排第14嘅彭美拉斯主場迎戰「二哥」聖保羅，後者今仗有前國腳路爾斯法比安奴刑滿復出，攻力復整，面對近況一般嘅彭美拉斯仲有得受讓平半咁筍，呢個下盤不容錯過。

（周一凌晨3時開賽，馬會網上文字直播）

成日都話巴西前鋒今非昔比，由比利、羅馬里奧、朗拿度、阿祖安奴、路爾斯法比安奴、費特，真係一蟹不如一蟹，不過「沒有最差，只有更差」，今屆美洲盃巴西衰到要召入中超前鋒迪亞高泰達利，見到都反胃，比較之下5年前被嘲笑為「森巴最平庸9號」嘅路爾斯法比安奴都唔係太差啫。

法比安奴復出齊腳
當然，34歲嘅路爾斯法比安奴已經唔奢望重返「森巴兵團」，只希望為成名地聖保羅攞番次巴甲冠軍，聖保羅今季開咧幾順，現時位列第2，絕對有機會染指錦標，今仗法比安奴刑滿復出，而且中場保斯捷拿同中堅盧卡奧為巴西踢完世青盃後歸隊，陣容齊整晒。

彭美拉斯現位處第14位，逐漸被捲入降班漩渦，連巴西盃在內近8仗贏得兩場咁大把，表現麻麻。而且中場核心佐治華迪維亞仍為智利踢緊美洲盃，新帥馬些路奧利華拉上任冇耐未摸熟隊波，唔好旨意佢即刻帶領球隊反彈，咁多問題，彭軍憑乜嘢讓波呢？梗係揀番受讓嘅聖保羅下盤喇。