国冠盃北美站听朝揭开战幔，由费伦天拿打头阵出战瓜达拉哈拉。「紫百合」有新班主上台，主帅蒙迪拿为保乌纱唔敢hea踢，必藉国冠盃争取高层信任，撞正对亲欧洲球队例脚软嘅瓜达拉哈拉，直取让球主胜。（myTV Super 周三早上9时直播）
费伦今次係顶替罗马参加国冠盃，今年4月先回巢执教嘅「飞机仔」蒙迪拿，因季尾战绩曳爆备受抨击，咁啱今夏有新美国班主科米素入主，正所谓新人事、新作风，如果战绩继续唔掂，佢都话唔排除会换帅，「飞机仔」唔想被炒就要醒醒定定，要认真应付国冠盃。费伦虽然冇乜添兵，费达历高基艾沙因早前出战U21欧国盃而未必赶及披甲，但阵中仍有基奥云尼施蒙尼、米拿拉斯等压阵，战斗力唔曳。
瓜达拉哈拉对欧洲队例脚软
昔日墨西哥班霸瓜达拉哈拉，近年喺墨超已今非昔比，上季首、次阶段均位处中下游，令人失望，近6次热身赛面对欧洲球队，只得1胜1和4负，就算今场喺美国比赛、有半个主场之利亦靠唔住。何况「紫百合」喺近4场国冠盃，法定时间取得2胜1和1负，包括赢过巴塞隆拿及车路士，遇弱可大胜抢头彩，让球主胜捧得过。