福星华加斯拍翻生A山
喺巴西举行嘅美洲国家盃听朝上演另一场4强大战，衞冕嘅智利恶斗奇兵秘鲁。智利王牌阿历斯山齐士（A山）一返国家队即刻醒神，率领球队逢关过关，其拍档伊度亚度华加斯近年成为剋死秘鲁嘅关键棋子，力争3连冠嘅智利有力赢波闯决赛，让平半捧上盘。（Now 650及Now E周四早上8时30分直播）
虽然阿历斯山齐士加盟曼联后，表现低迷为人诟病，但呢位翼锋返回智利国家队例必翻生，单计今届美洲盃，就入咗2球兼交出1次助攻，愈打愈有信心，同喺红魔鬼嗰阵可以话判若两人。
秘鲁死火交白卷多
「A山」、维达尔、加利美度、伊度亚度华加斯几个智利兵合作多年，亦係呢支国家队连续两届美洲盃封王嘅骨干，论默契肯定赢晒。智利喺美洲盃C组虽然仅以次名出线，但上场8强面对B组「一哥」哥伦比亚不落下风，最终凭互射12码胜出踢走对手，表现硬淨。现时智利士气正盛，4强面对实力一般嘅秘鲁，势必搏尽争胜。
力争继1975年后再次打入决赛嘅秘鲁，喺今届8强同样藉互射12码淘汰乌拉圭，但睇番佢哋今届表现，法定时间仅得1胜，包括分组赛尾轮惨吞巴西5蛋，王牌法芬又因伤续抖，依家单靠老将荷西古里路数胡，点都差啲，难怪今届4战有3场交白卷。
睇埋两军近5次交手，智利取得4胜1负，伊度亚度华加斯喺当中4场有份上阵，3场梅开二度轰入6粒，堪称秘鲁剋星，智利有力连续3届杀入决赛，今场小让平半，上盘有买趁早。