听朝继续有美职开快车，阿King最有心水係尾场洛杉矶银河主场迎战FC多伦多。银河王牌伊巴谦莫域脚风唔多顺，令战绩飘忽不定，撞正剋星FC多伦多必冇啖好食，仲要让波咪掂，转捧让球客胜。
（myTV Gold 301、Now 638、有线654及614台周五早上10时30分直播）
伊巴谦莫域脚风唔顺
东岸前列分子银河，一向靠伊巴谦莫域搵食，但呢位瑞典神箭毕竟已经37岁，状态有起伏亦人之常情，佢近6场有披甲赛事仅入两粒，脚风麻麻，球队亦只得3胜3负，可见伊巴弗唔弗，对银河影响甚大。虽然FC多伦多只排东岸中游，但近况略有起色，近5仗取得1胜3和仅1败，中场迪里安更有3球进帐，表现硬淨顶得两嘴，加上双方近3次交手，FC多伦多全部赢晒，仲有得受让咁笋，让球客胜咪错过。
串达拉斯大急流上盘
至于早少少开波嘅FC达拉斯主场对华盛顿联队，同伊巴喺曼联做过队友嘅华联箭头朗尼，近4次上阵入4粒，仲係场场有波入劲弗，FC达拉斯主场出击特别进取，近5次主场全开3球或以上，斗攻格局捧2.5球嘅入球大。（myTV Gold 302、Now 639、有线655及615台周五早上9时直播）最后係同时间开波嘅科罗拉多急流主场对新英伦革命，急流近况唔错，近8仗取得5胜3和未输过，若果单计主场联赛，近4场全部赢晒，面对作客麻麻嘅革命，可食住个势再下一城，小让平半可捧上盘。