于英超歇冬前，本周中分别于星期二至四晚有第24周赛事，笔者专栏尽量分析3晚重要赛事。今晚有2场焦点赛事，护级大战阿士东维拉对屈福特，以状态计，屈福特係下游球队之中最好，维拉今场有主场之利，但要赢屈福特似乎有难度，和波都仲有可能。至于车路士对阿仙奴，车路士有主场之利，兵工厂喺阿迪达领导下，虽然用同样嘅人脚，但最近成绩却係好过之前嘅艾美利，双方势均力敌，所以我认为今晚呢两场焦点赛事，和波机会好高。

至于周三晚，李斯特城、热刺及曼联3支比较有实力嘅球队都会主场出击，分别对韦斯咸、诺域治同般尼。呢3支名牌喺圣诞后表现係「阿陀行路－舂舂哋」，我估计热刺可以全取3分，至于李斯特城同曼联对住「猪头骨」比较难取胜。

利物浦则会喺周四出击，红军由老闆约翰亨利到高普，以至名宿们及球员，即使现在静静提早庆祝夺得英超，都不算太过招积。今场作客对住排第6，但其实积分相距30分嘅狼队，红军凭住足够嘅休息及希望延续联赛不败纪录嘅信念，我相信作客都有机会再下一城。有时冠军队，好运起上嚟，连赛期编排都对佢哋有利，星期日晚打完后球队有4日休息，狼队呢场好难赢波，因为红军最劲唔係进攻，相反係稳健嘅防守。红军由门将、中坚到两边闸都有身材兼当打，而且发挥稳定，等闲球队要入波极有难度。