周三凌晨英超两强喺欧联背城借一分途出击，其中C组「红军」利物浦将会主场硬撼拿玻里。利物浦要争取出线嘅条件其实好简单，一系乾脆利落以1比0击败对手，一系就要以2球或以上优势取胜，只要达成上述其中1项战果，红军就可以唔使睇另一场战果，直接顺利晋级淘汰赛。
当然讲就容易，要令拿玻里一球都唔入，仲要前场进攻有货交，绝对唔简单，「红军」想成功突围，就要交出强者生存应有嘅，好似外国人讲开嘅英文金句："When the going gets tough, the tough gets going"意思即系强者能喺险境生存、遇强愈强也！相反同组另一场比赛，巴黎圣日耳门（PSG）作客对住小组包尾贝尔格莱德红星，可以话系胜券在握。PSG上届欧联贵为大热球队，却早早喺16强就遭淘汰出局，今季球队实力更胜以往，对住弱旅冇理由唔赢波。
B组出线形势微妙
至于B组有热刺作客巴塞隆拿，巴塞赛前已经锁定首名位置，所以呢场无论结果如何，对巴塞嘅小组形势系一啲影响都冇，变相成为对热刺嘅有利之处，而同热刺同分嘅国际米兰，面对肯搏尽嘅燕豪芬，想赢波其实都绝对唔容易，所以笔者认为B组嘅形势其实相当微妙。