未讲欧联之前，我想讲讲曼联刚于英格兰足总盃16强轻取车路士2比0，进身8强。势估唔到季初好哋哋伦敦双雄车仔同阿仙奴，踏入季中跌落谷底，今季才执教两军嘅沙利及艾美利，与球员嘅蜜月期仲短过普遍夫妻。相反，季初喺摩连奴麾下看似无药可救嘅曼联，改由苏斯克查领军后，即从谷底反弹，8强又避开同市死敌曼城，随时去到决赛先上演曼市打吡。本来连场报捷嘅皇马，喺上轮西甲竟然爆大冷，反输畀2个几月未赢过嘅弱旅基罗纳1比2，足球引人入胜之处，莫过于此。
至于其同市死敌马德里体育会，今晚欧联16强首回合喺主场迎战祖云达斯，虽然祖记有C朗助阵下如虎添翼，赢到冇停手，但要留意佢哋近年已垄断意甲，而且喺今届欧联亦输过畀曼联，马体会喺铁帅施蒙尼领导下一向硬淨，今仗打和唔奇。
同晚另一场欧联16强，史浩克04主场对曼城，史浩克今季沉沦于联赛下游，难有野心兼顾欧联，气势如虹嘅「蓝月亮」，就算出5名副选亦绰绰有馀，今仗可谓「依丝W」。