巴塞隆拿捧盃尔成定局
 
西班牙盃决赛今晚喺鲁营球场上演，势如破竹嘅巴塞隆拿为争做三冠王，一定会施展浑身解数，到访嘅毕尔包真係大难临头，故即使足智彩让球主客和狠开「-2」，巴塞隆拿「让主」依然买得过。（周六33，now632台周日3:30am直播）
 
巴塞隆拿季尾有几勇唔使多讲啦，淨係欧联淘汰拜仁慕尼黑一幕已经係经典，另外力挫马德里体育会以致提早喺西甲封王，故即使最后一轮打和拉科鲁尼亚放生对手，都完全冇影响士气，沙维仲趁嗰场波作告别战添！巴塞隆拿喺今场西班牙盃决赛前亦收到好消息，乌拉圭前锋苏亚雷斯已经复操，有望披甲对毕尔包，虽然有指佢复操唔係正式，但由于巴塞锐意做三冠王，教练安历基当然想哨牙苏、尼马同美斯继续组「MSN」攻坚啦！
 
毕尔包历史悠久，第一届西班牙盃得主就係佢哋，不过呢啲都係咸丰年前嘅事喇，近年试过打入欧霸盃决赛可惜功亏一篑，加上成日卖走球星，依家得一个蒙尼恩叫做有啲星味，其馀好似伊拉奥拿同埋托基路就年纪渐老。话虽如此，毕尔包季尾其实状态都唔算差，起码保持紧7场不败，西甲煞科战大胜维拉利尔亦令人欣喜，好可惜蒙尼恩已因伤提早收咧，10号仔迪高马斯今晚要坐波监，佢同时係球队嘅罚球专家，缺少咗佢两个，当然会令毕尔包嘅进攻瓣数减少啦！
 
拣鲁营比赛有段故
 
其实今晚嘅比赛场地鲁营係有段故事，因为早喺3月份时，巴塞申请去班拿贝上演，但足总就想喺毕尔包主场踢，点知唔关事嘅爱斯宾奴走嚟投诉，指毕尔包保安有问题，结果赛会都係决定喺鲁营踢决赛，毕尔包真係多得爱斯宾奴唔少，巴塞开「让主」简直係一早注定啦！