聽朝美職有場直播賽事，波特蘭伐木者主場對西雅圖海灣者，呢個戲碼喺個幾禮拜前於美聯盃上演過，當時伐木者加時以3比1擊敗對手，呢場亦令到海灣者星級主將丹普西被罰停賽3場兼罰款，今場亦唔踢得，加埋馬田斯因傷缺陣，海灣者攻力嚴重受削，細盤捧得過。

（TVB 301周一早上7時直播）

海灣者前鋒丹普西喺美聯盃對伐木者一戰，因為不滿球證出示紅牌趕隊友出場，突然狂性大發，搶走咗球證本記事簿兼撕爛，咁鹵莽梗係畀球證趕離場啦，最慘係事後美職賽會即刻罰咗「丹爺」喺聯賽停賽3場，今場冇得再戰伐木者。

咪睇「丹爺」已經32歲，佢嘅戰鬥力仍然好強，喺聯賽以7個入球同隊友馬田斯並列球隊神射手，偏偏海灣者今場除咗「丹爺」停賽外，連另一尖刀馬田斯都冇埋，佢咁蹺又係喺美聯盃對伐木者之戰整傷腹股溝，結果要抖3至6個星期，今場亦唔使預佢。冇咗呢兩大鋒將，海灣者即刻唔識入波，近兩場美職對住中下游球隊費城聯及聖荷西地震都輸波兼零入球，認真濕滯。

伐木者剛大敗止血為先
不過主場嘅伐木者亦唔好得幾多，佢哋上場作客洛杉磯銀河失驚無神輸夠5蛋，後衞列治維亦領紅離場，今場坐波監。突然之間一場輸咁多粒，梗係要做好防守止血先喇，一陣嚟多場大敗仲得了？今場一隊唔識入波，一隊就避免失波，一於捧1.72倍細盤喇！