8強遇手下敗將澳洲
喺加拿大上演嘅女子世界盃8強戰，「巨人殺手」澳洲女足將硬撼衞冕日本女足。澳洲女足喺16強爆冷淘汰巴西女足，但嗰場波其實係「森巴女」踢得差，澳洲女足實力冇想像中咁強。日本女足今屆賽事表現雖欠霸氣，但實力始終高過澳洲，加上近6次交手贏咗4場，阿謙睇好「東洋魔女」，1.98倍客W值支持。（中央5台周日凌晨4時直播）

澳洲女足上仗16強遇上熱門之一嘅巴西女足，憑後備卡雅絲蒙攻入全場唯一入球淘汰對手打入8強。不過佢哋能夠爆冷贏波並非球隊有醒神演出，實情係巴西女足「衰自己」，一班主力完全踢唔出水準。澳洲女足今仗面對日本女足唔會咁易踢，雙方過去曾交手6次，「東洋魔女」取得4勝1和1負嘅戰績，包括去年女子亞洲盃決賽以1比0擊敗澳洲女足捧盃。

日本女足今屆表現雖然麻麻，但喺主將澤穗希、宮間綾及大儀見優季帶領下已連贏4場，雖然每場都僅勝對手1球「煲魚生粥」，但佢哋每每半場領先後可以一直保住勝果到完場，可見「東洋魔女」韌力十足，今仗面對舊年亞洲盃決賽手下敗將，阿謙睇好佢哋可以再次擊敗澳洲女足，進取嘅可以諗埋日本女足半場勝。

加妞英女玩鋪「大」
另一場8強由東道主加拿大女足鬥英格蘭女足，加拿大女足今屆賽事表現唔錯，主場出擊肯定喪攻求勝。不過英格蘭女足自分組賽首仗輸畀法國女足後已連贏3場2比1，狀態逐步提升，今仗面對踢得主動嘅加拿大女足都係捧大盤啱數。（中央5台周日早上7時30分直播）